Mga Tulang Bantoanon

	Ryan Fauli's Yagting Cultural Heritage Collections Yagtings are invited to contribute poems of and about the island.
	Mga Tulang Bantoanon

These poems by Abner Faminiano were featured in Silak, a quarterly newsletter for Bantoanons.

	Nidog ni: Abner Faminiano
	Sa pangabuhi reling ato isla Buko asi-asi ka ida halaga Tanom natong nidog, bay-anan et kwarta Pangtustus sa anak nak nag-iiskuyla. Kag unang panahong pingga’y waya pa Liwag pa ag hungot, bagoy nak kutsara Nidog nak sanggutan, tuba nak malasa Bale giyag-ukon ag ibha’t kukanta.
	Bangkat ni: Abner Faminiano
	Mga Bantoanon sa pagbaba’t bangkat Ay naging makusog, matigson ka yawas Aber niong obra’y waya gui aatras Matyaga, maabtik, hanuyos ka buhat Aya nato’g limti, sa anga'y irukyat Nak kung waya'g baba’t bangkat si Tatay Waya ngasing kita nalibwas sa hirap Kali’y hanrumanang sarang ipalabwak Bilang at pagtamor sa inrang nagsikap.
	Ramyog ni: Abner Faminiano
	Barutong sakdanang matulin, matibay Asa yawor, perming imo maantaw, Simbulo’t kahugor ag at’ pag-arisgar Nak sa pagkakubos kita ay mahilway Pagkatapos ngani’t panahong naglikwar Ramyog naging lanson sa ida pagyutaw Kita’y nakatabok sa at’ pagsaklilaw Wayag alibhata biyahe ma’y mayawhaw Dahil ayam natong pag runggo’y ginhaway.
	Tiral ni: Abner Faminiano
	Sikar, bugsok, rasok, siling et papitlo Trabahong panghabo'y asa ato rugo Ka ngayan nak tiral ay hanrumon nato Sa banwang Bantoon, bulig ay maramo Sagurang nak tamong ag kubay nak baro Sayap, sikpaw, yadag, angay ipagmarako Nak sa durong hirap kita ay nayado Tiral saulion, irukyat sa puso Ag ipasalamat sa at’ Makaako.
	Bugdong ni: Abner Faminiano
	Suyang nakisahi, bayada’y gamit ra Pag imo hinudpo nagulpi’t barlowa Kung sa mga bukir ay enggwa it junta Mayagong nak tunog imaw pang-ayaba Mga namamarayo ay nababayaka Pagtunog et bugdong, nababayak sinra Nalambong nak gador waya ruha-ruha Ngasing kinahanya’t higugmang banwa Bugdong ay patunggon: Kita ay magkausa.